دكتور أنا ما عم نام الليل من رجلي بحس فيهن خدر و سخونة خاصة لما اجي بدي نام

بإختصار هالحالة منسميها متلازمة القدم غير المرتاحة Restless legs syndrome
و طبعاً الاسم كتير مناسب للحالة أنو المريض لما يجي لقعد يرتاح او يتسطح لينام يبلش يحس بشعور غريب برجليه بدايقو و ما بيرتاح ليحركها
الشعور ممكن يكون سخونة أو تنميل او حكة او حتى شعور غريب يتعذر على المريض أنو يوصوفو بيجي المريض يقلك رجلي مو مرتاحة
وأهم ما يميز الحالة أنها بتجي بالليل
.
#شو_سبب_الحالة_المباشر ؟
ما في سبب معين معروف الها و لكن أخر ابحاث توصلو الها الباحثين انو الخلل بالدوبامين ضمن الدماغ بيلعب دور بالحالة
.
#أسباب_مرتبطة_بالحالة :
- الوراثة : ممكن هالحالة تكون موجودة بعيلات أكتر من غيرها و تنتقل وراثياً
- الحمل : تقلب الهرمونات خلال الحمل بزيد من هالحالة
- الاعتلال العصبي : مهما كان مسببو سواء سكري او أعواز فيتامينات بيلعب دور بالحالة
-عوز الحديد : من أهم الامراض المرتبطة بالحالة وكتير ناس بس عالجنا عوز الحديد عندهم راحت الحالة فوراُ
-القصور الكلوي
- أمراض النخاع الشوكي : وخاصة الديسك
.
#تـأثير_الحالة_على_المريض :
بعض المرضى ما بيعيرو اي اهمية للحالة وينسوها و حتى ما بزورو الطبيب و البعض الاخر ما بنامو الليل منها وتأثر على حياتهم بشكل كبير
.
#التشخيص :
لنشخص الحالة في عنا عدة معايير و قبل النظر للمعاير مهم ننفي وجود الحالات اللي ذكرناها سابقا من عوز حديد وغيرو أما المعايير فهي
- شعور غير مريح بالقدم من سخونة او حكة او كهربا و بيدفع الشخص لتحريكها
- الاعراض تجي على الراحة متل الجلوس و الاستلقاء وخاصة بالليل
- الاعراض تزول لما تحرك القدم أو تلعب رياضة
- لا يمكن عزو الاعراض لمرض عضوي اخر
.
#العلاج :
مهم جداً نعالج الامراض العضوية الموجودة متل عوز الحديد او الاعتلال العصبي و اذا ما انوجد مرض عضوي بنلجأ لبعض العلاجات مثل
- الأدوية اللي بتزيد الدوبامين بالدماغ مثل Ropinirole طبعاً الها تأثيرات جانبية وما بتنعطى الا اذا الاعراض شديدة وتحت اشراف الطبيب
- و في ادوية تانية ممكن تفيد لا مجال لذكرها
.
#ملاحظة : المرض بشكل عام بسيط ومن النادر جداً انو يترافق مع حالة خطيرة
المرض منتشر عند النساء اكتر و بزيد مع تقدم العمر
ممكن يصيب الادين كمان بس هالشي نادر
#دمتم_سالمين :)
الدكتور:خالد جمعة